Министерката за животна средина и просторно планирање Каја Шукова, денес потпиша договори со градоначалниците на петте општини, Берово, Валандово, Чучер Сандево, Прилеп и Пласница на кои преку пренамена на финансиски средства од буџетот им се доделија средства за реализација на инфраструктурни проекти со кои ќе се придонесе кон заштитата на животната средина и кон подобрување на квалитетот на живеење на граѓаните.
Со ребалансот на Буџeтите на 6 министерства и една агенција, односно од министерствата за здравство, образование и наука, труд и социјална политика, култура, транспорт и врски, животна средна и просторно планирање и Агенцијата за млади и спорт, Владата на РСМ, со поддршка на Собранието обезбеди вкупно 2 милијарди денари или 32,5 милиони евра наменети за вкупно 66 проекти на 44 општини.
Во животната средина ќе се инвестираат средства во висина околу 183,8 милиони денари и тоа во општина Прилеп, 90 милиони денари за Изградба на фабрика за рециклирање на отпад, во општина Чучер Сандево, 60 милиони денари за изградба на Пречистителна станица Кучевичка Бара, во општина Пласница 8 милиони денари за Пречистителна станица за населените места Преглово и Лисичани, во општина Берово 4,654 милиони денари за Основен проект за изградба на отворен канал за атмосферска вода, и во општина Валандово 21,167 милиони денари за Основен проект за дел од колектор за градот Валандово.
