(03.12.2019)Sot në Shkup, në kuadër të Panairit të Parë Ndërkombëtar dhe Konferencës për Burimet e Rinovueshme të Energjisë, Efiçiencën e Energjisë, Mbeturinat dhe Ujin, RENEXPO organizoi një konferencë për menaxhimin e qëndrueshëm të ujit në Republikën e Maqedonisë së Veriut. Konferenca u drejtua nga Nikolla Bertolini, udhëheqës i Sektorit për Bashkëpunim pranë Delegacionit të BE-së në Shkup dhe Zëvendësministri i Mjedisit Jetësor dhe Planifikimit Hapësinor Jani Makraduli.
Në fjalën e tij, zëvendësministri Makraduli përcolli vullnetin dhe angazhimin politik të Qeverisë së Republikës së Maqedonisë së Veriut për të përmirësuar cilësinë e ujit dhe përdorimin racional të potencialit të tij, si një imperativ i të gjitha institucioneve shtetërore dhe publike, por edhe i gatshëm për të bashkëpunuar me faktorë të ndryshëm, sepse arritja e qëllimeve të përcaktuara është e mundur vetëm përmes aktiviteteve dhe masave të përbashkëta, të menduara dhe të planifikuara.
“Pikërisht kjo është arsyeja pse, si zëvendësministër i Mjedisit Jetësor dhe Planifikimit Hapësinor, unë jam i përkushtuar të krijoj një platformë plotësuese, të ekuilibruar midis menaxhimit adekuat të burimeve ujore, i cili është një nga burimet më të rëndësishme të rinovueshme të energjisë, dhe mbrojtjen e mjedisit, pra krijimin e një kornize adekuate me udhëzime për zhvillimin ekonomik të vendit tonë ”, theksoi Makraduli.
Sipas tij, është me shumë rëndësi edhe ajo që mbrojtja e mjedisit ka zërë vendin e saj në procesin e Berlinit.
– Ne kemi demonstruar gjithashtu vullnetin tonë politik me Planin e Veprimit në pajtim me Marrëveshjen e Prespës, ku ne punojmë së bashku në një numër projektesh që lidhen me menaxhimin ndërkufitar të ujërave, parandalimin e ndotjes së ujit dhe monitorimin e cilësisë së ujit, të gjitha në përputhje me marrëveshjet dhe kërkesat ndërkombëtare në fuqi, që burojnë nga legjislacioni i BE-së.
Në konferencë, ekspertë vendas dhe të huaj morën pjesë me punimet e tyre për projektet e planifikuara dhe të zbatuara, të cilat ilustrojnë më së miri zhvillimet dhe tendencat më të fundit në sektorët e energjisë, mbrojtjes së ujit dhe menaxhimit të mbeturinave. Kjo ka bërë të mundur shkëmbimin e përvojave dhe njohurive në fushën e mbrojtjes dhe menaxhimit të qëndrueshëm të ujit, duke ndjekur tendencat aktuale për përdorim më të madh të burimeve të rinovueshme të energjisë, si një mënyrë për të ruajtur burimet natyrore dhe ruajtjen e mjedisit.
